Hvernig myndast þetta?

Þessar vörtur myndast af veirum sem sýkja húðina, sérstaklega human papilloma virus (HPV). Smit verður milli einstaklinga með beinni snertingu t.d. handartaki eða óbeint í gegnum hluti eins og sameiginlegt handklæði. Vörtur geta staðið árum saman. Sjá einnig greinina „Flatar vörtur“ en þær setja sig gjarnan á handarbök og stundum enni.

Hvað er til ráða?

Ýmsar leiðir eru til að fjarlægja vörturnar og er hér nokkurra getið:

A. Frysting og vörtueitur saman.

Meðferðin hefst á því að efstu lög húðþekjunnar yfir vörtunum eru skafin af. Síðan er beitt köfnunarefnisfrystingu og að lokum er sett vörtueitur á vörturnar sem haft er á húðinni mismunandi lengi áður en það er þurrkað í burtu t.d. með blautum pappír. Í kjölfarið er vonast til þess að bólga verði á meðferðarsvæðunum en án hennar skeður lítið eða ekkert. Á fótum er vonast til þess að bólgan verði ekki það mikil að erfitt verði að stíga í fætur. Það eru aðallega tveir þættir sem hafa áhrif á hversu mikil bólgan verður en það er tíminn sem eitrið er haft á húðinni og það álag sem meðhöndlaður líkamshluti verður fyrir. Sé um fætur að ræða sem meðhöndlaðir eru í fyrsta skipti er ráðlagt að sleppa íþróttaiðkun í 2 sólarhringa því til eru þeir sem bólgna hressilega af eitrinu. Eftir fyrsta skiptið er ljóst hversu viðkvæmur einstaklingurinn er og tíminn sem eitrið er haft á þá annað hvort aukinn eða minnkaður. Meðferðirnar eru endurteknar í nokkur skipti á u.þ.b. 3ja vikna fresti þar til vörturnar hafa gefið sig. Þessi meðferð er ekki álitin vera örmyndandi.

B. Brennsla.

Í völdum tilfellum eru vörturnar deyfðar með deyfilyfi undir húð og vörturnar síðan brenndar og skafnar burtu. Aðferðin getur valdið öri og stundum þarf að endurtaka hana. Á svæðum þar sem álag er til staðar eins og t.d. yfir tábergi og hælum er æskilegra að beita meðferðinni sem byggir á frystingu og vörtueitri hér að ofan því örmyndanir þær sem geta hlotist af brennslu geta leitt til varanlegra verkja er stigið er í fæturna þar sem örin kunna þá að þrýsta á taugar.