Rósroði (e. rosacea) er krónískur bólgusjúkdómur í húð en getur einnig birst í augum. Hann einkennist af roðaköstum (e. flushing) sem framkallast oft af litlu áreiti og viðvarandi roða með litlum sýnilegum æðum miðlægt í andlitinu. Honum fylgja gjarnan nabbar (e. papules) og graftarnabbar (e. pustules).
Við bjóðum upp á mismunandi meðferðir gegn rósroða en meðferðarúrræði fer eftir tegund.
Algengi rósroða er hæst hjá miðaldra fólki með ljósan hörundslit sem hefur ættir sínar að rekja til Norður-Evrópu. Konur eru líklegri til að fá rósroða en karlar á meðan karlar eru líklegri til að fá brennivínsnef (e. rhinophyma) sem einkennist af svokölluðum hnúskakvillum (e. phymatous rosacea) á nefinu.
Framkallandi þættir roðakasta eru í reynd allir þeir þættir sem geta fengið æðar í andlitinu til að víkka út. Má þar nefna hita t.d. við líkamlegt eða andlegt álag, heita drykki eða hita í umhverfi. Alkóhól, kryddaður matur og koffein eru allt þekktir þættir bak við köst.
Rósroði er gjarnan flokkaður í 4 flokka og einn undirflokk:
- Hörundsroðaháræðaslit (e. erythematotelangiectatic)
- Nabbar og graftarbólur (e. papulopustular)
- Hnúskakvillar (e. phymatous)
- Augu (e. ocular)
- Afbrigði: Holdgunarhnúðar án bólgu (e. granulomatous non-inflammatory)
Ert þú með rósroða?
Greining rósroða í húðinni byggir á klínísku mati lækna. Það eru engin próf sem gefa greiningu en þau geta verið nauðsynleg til að útiloka aðra sjúkdóma svo sem flösuexem og rauða úlfa (e. systemic lupus erythematosus).
